Претседателот на Синдикатот на работниците од приватниот сектор, Јусуф Аземи, вели дека работниците очекуваат минималната плата да биде над 400 евра, бидејќи во спротивно Косово ќе се соочи со зголемено заминување на работната сила, пренесува Репортери.

„Сите работници кои ќе бидат опфатени со Законот за минимална плата се оние кои вршат услуги за институции како чистење, одржување на болници и други објекти и тоа негативно ќе се одрази. Сметаме дека минималната плата треба да биде 450 евра годинава и 500 евра догодина. За кратко време Владата ќе се чувствува најголем губитник, бидејќи оваа политика ја губи работната сила“, рече Аземи.

Претседателот на Бизнис Алијансата на Косово, Агим Шахини, вели дека ова е задоцнето зголемување. Според него, има повеќе од 60.000 работници кои земаат плата од 170 евра.

„Мнозинството компании ја поздравија оваа одлука, покажувајќи дека со неа се зголемија платите на работниците“, рече Шахини.

Претставниците на синдикатот посочуваат дека Владата има потенцијал да ја зголеми минималната плата, но велат дека нема политичка подготвеност. Според Законот за плати, минималната плата се очекува да има вредност од 264 евра бруто за сите вработени во јавниот и приватниот сектор. Минималната плата во Косово во моментов е 130 евра за работници до 35 години и 170 евра за работници до 65 години.