Автопатот што ќе се гради од скопската обиколница кај Стенковец, до пред граничниот премин Блаце ќе чини 186,7 милиони евра, пишува во јавниот повик за изведувач што го објави Јавното претпријатие за државни патишта.

Европската банка за обнова и развој (ЕБРД) обезбедува заем од 167,6 милиони евра, за кој гарантира државата, а договорот во јули го потпиша директорот на ЈПДП, Ејуп Рустеми. Проектот ќе биде кофинансиран со инвестициски грант од 20,8 милиони евра, обезбеден од Европската Унија преку Инвестициската рамка за Западен Балкан (WBIF).

Рустеми во јули изјави дека за проектот се обезбедени вкупно 194 милиони евра.

Од државното претпријатие велат дека последните два километра до косовската граница веќе се финансирани од јавното претпријатие и оти таму во тек се градежни активности.

„Проектот ќе ја финансира изградбата на нова под-делница долга 10 километри на автопатот TEN-T Рута 6 што оди од Скопје (обиколница Стенковец) до клучка Блаце, блиску до границата со Република Косово“, се вели во повикот.

Во законот за гаранција, кој веќе е изгласан во Собранието, е утврдена истата сума од 186,7 милиони евра, а дополнително се наведува дека долгот ќе се отплаќа 16 години. На автопатот со две главни и една помошна лента ќе има 11 тунели со вкупна должина од околу 4,8 километри, а предвидени се и девет моста по коловоз во правец, во должина од 1,35 километри.

Автопатот од косовската граница до Приштина, кој беше целосно пуштен во употреба, чинеше околу 650 милиони евра, односно по околу 11 милиони за 60-те километри.

Проценет датум на почеток на проектот е 17 ноември годинава. Првата рата од заемот треба да се исплати во 2026. Автопатот би се градел четири години. Изградбата на првиот дел од автопатот Скопје-Блаце доцни речиси една година. Во јануари 2020 година, властите потпишаа договор со градежно претпријатие Гранит за започнување на првиот дел од работите, поточно за изградба на два, од вкупно 12 километри, но рокот не се почитува.