Коментирајќи колку автомобилите учествуваат во зголемувањето на и онака лошото загадување на воздухот во Белград, проф. д-р Иван Благојевиќ од Катедрата за моторни возила на Машинскиот факултет во Белград вели дека влијанието на моторните возила не може да се одвои од влијанието на другите емитери, објави Политика.

„Според податоците на Програмата на Обединетите нации за животна средина од 2020 година, учеството на патничките возила во вкупната емисија на јаглерод диоксид, што потекнува од човековите активности на светско ниво, е само четири проценти. Во Европската Унија уделот што го постигнува патниот транспорт е 19 отсто, додека патничките возила се застапени со 12 отсто во вкупниот биланс на емисиите на јаглерод диоксид во ЕУ“, вели д-р Благојевиќ, нагласувајќи дека „за Србија, сепак, таму нема податоци“, наведува Енергија Балкана.

Како најважен податок професорот ја истакнува староста на возниот парк во Србија која во просек изнесува 17,4 години. Тоа значи дека на патиштата се уште има голем број многу стари автомобили, кои не беа ни класифицирани според нивото на емисија на издувни гасови.

Дополнително, во Србија сè уште се увезуваат многу голем број возила со полоши карактеристики на издувните гасови. Тој нагласува дека годишно во Србија се увезуваат приближно 150.000 патнички автомобили. А има и такви кои имаат емисија на издувни гасови Еуро 3 (кои стапиле во употреба уште во 1998 година, па може да се увезе возило старо 26 години) или Еуро 4, чиишто емисии се многу полоши според граничните норми од моментално важечка емисија Eуро 6.