Автобус на Јавното Сообраќајно Претпријатие (ЈСП) денеска удрил во повозрасен човек на крстосницата кај Транспортниот центар. Човекот, кој според медиумите имал околу 80 години, е тешко повреден и бил реанимиран, а лекарите и натаму се борат за неговиот живот.

Инцидентот се случил денеска околу 11:45 часот. Телевизијата „Алсат“ објави сведоштва на минувачи, кои велат дека човекот се движел полека потпирајќи се на бастун, зад автобусот, и не забележал дека тој се движи во рикверц. Автобусот го удрил со мала брзина, но повредите со кои се здобил човекот биле тешки. Сведоците велат дека пожарникарите и брзата помош пристигнале многу брзо и го пренеле повредениот во Ургентниот центар.

Полицијата презема мерки за расчистување на случајот и утврдување на сите околности кои довеле до оваа несреќа. Се очекува дополнителни информации да бидат објавени по завршување на истрагата.