Портрети од Родољуб Анастасов се претставени во Музејот на град Скопје во рамките на изложбата со наслов „Визии – Глава полна со луѓе“, која беше отворена на 3 јули оваа година.

Музејот на град Скопје пред македонската јавност претстави изложба со дела од македонскиот сликар Родољуб Анастасов. Извонредниот портретист од својот мемориски трезор изнедри портрети насликани во периодот од 2016 до 2022 година.

Со наслов „Визии – Глава полна со луѓе“, изложбата е поставена во Салон 2 на Музеј на град Скопје. На отворањето на изложбата се обратија д-р Панче Велков, директор на Музеј на град Скопје, Љубен Пауновски, автор на каталогот, и Јасминка Намичева, куратор на изложбата.

– Новата и досега неизложена серија на цртежи на Родољуб Анастасов е пресврт во неговото уметничко творештво. Тие ни претставуваат еден сосема поинаков Анастасов, каков што не би очекувале со оглед на неговата повеќедецениска потполна посветеност на нему омилениот циклус „Човек и простор“, со кого стекна меѓународен углед. Во оваа серија на цртежи со мноштво портрети / ликови во еден цртеж, станува збор за портретирање на луѓе според записите на нивните ликови во меморијата на уметникот. Тоа е рационално осмислен уметнички проект, иако е произлезен од драматични настани и состојби во животот на уметникот што се случиле во 2008 година. Следувал осумгодишен период на самотија, со многу превирања во емоциите, тешки прашања во мислите, постојана свртеност во сеќавањата од животот и мирување на четките и моливите.

Во 2016 година настапило релативно смирување, доволно за Анастасов да ја започне оваа нова серија на цртежи, а повремено да вклучува и цртежи според тематскиот циклус „Човек и простор“, но сега како секвенции фокусирани само на толпите кои се затекнати или се движат во недефиниран или, пак, само бегло означен простор или пространство. Меѓутоа, продолжувајќи да живее во типична самотија, уметникот и натаму со емоциите и мислите продолжил да гледа внатре во себеси, во меморираните настани што ги доживеал на неговиот изминат животен пат и во ликовите на луѓето што од животот влегле во неговиот ментален албум – забележува Љубен Пауновски во својот обемен текст за творештвото и личноста на Родољуб Анастасов, објавен во каталогот за изложбата.

Бесконечната борба на ангелите и демоните во менталниот багаж на Анастасов е амалгамот на најновиот циклус на цртежи со кои сликарот се обидува да ги соголи лузните од своето животно патешествие. Монографскиот изложбен концепт насловен „Визии – Глава полна со луѓе“ е составен од збирка со 57 цртежи, изработени со молив и молив во боја на хартија во мали формати, и четири портрети на платно во маслена техника.

– Огромно е задоволството да се соработува со Родољуб Анастасов, кој, всушност, претставува вистинско живо културно наследство и токму затоа уште поголема е честа што тој реши своите „Визии“ да ги сподели со сите нас. Овој уметнички запис и изложбена поставка е огледало на општеството во кое живееме, но истовремено и автобиографски омаж на човекот-уметник Родољуб Анастасов – истакнува кураторот Јасминка Намичева.

(Текстот е објавен во „Културен печат“ број 186, во печатеното издание на весникот „Слободен печат“ на 8-9.7.2023)