Коалициските преговори помеѓу Австриската народна партија (ФПО) и Слободарската партија (ОВП) оваа недела влегуваат во одлучувачка фаза. И додека на некои делови од договорот, како што е поделбата на ресорите, им се гледа крајот, остануваат длабоки програмските поделби во врска со антиевропската реторика на ФПО.

Прашањето дали сино-црната коалиција навистина ќе се оствари, станува сѐ поитно, особено во светлината на несогласувањата што се појавија во изминатите денови. Клучните министерства, како министерството за внатрешни работи, сè уште се предмет на спорови, а разликите во ставовите се големи, како што покажуваат документите достапни во австриските медиуми. Лидерите на ФПО Херберт Кикл и ОВП Кристијан Штокер ќе се обидат да ги решат овие несогласувања на највисоко ниво.

Еден од договорите што се чини дека е постигнат, е дека агендите за Европската Унија ќе се вратат во надлежност на Министерството за надворешни работи, кое би му припаднало на ОВП, додека уставните агенди би останале во канцеларијата на канцеларот, која би била водена од ФПО, како и Министерство за финансии. Сепак, голема пречка останува прашањето на Министерството за внатрешни работи, кое двете страни сакаат да го контролираат. Претставник на ОВП изјави дека доделувањето и на финансиите и на внатрешните работи на ФПО би било „недозволиво“.

Протоколите од работните групи покажуваат длабоки поделби помеѓу ФПО и ОВП. На пример, ФПО сака да спроведе насилно враќање на мигрантите на австриските граници и драстично да го смени правото на азил. ОВП бара јасна поддршка за Европската Унија од ФПО, која, пак, инсистира да се отстранат знамињата на ЕУ од официјалните објекти, Австрија да се повлече од пандемискиот договор на Светската здравствена организација, како и од програмата на НАТО – Партнерство за мир.

Лидерот на ФПО, Херберт Кикл, кој за време на викендот во Мадрид беше присутен на Патриотскиот конгрес на претставници на екстремните десничарски партии, им порача на своите истомисленици „да ја направат Европа повторно велика“. Тој ја критикуваше централизацијата на Унијата и им изрази поддршка на оние што се противат на нејзината доминација.

Во ОВП изјавите на Кикл не поминаа незабележано.

– Кикл беше, е и ќе остане популист – оцени еден од преговарачите на ОВП.

Некои во ОВП изразија загриженост поради антиевопската реторика на ФПО. Претставниците на стопанството, како Волфганг Хатмансдорфер и Курт Егер, истакнаа дека таквата политика на Австрија би била штетна за економијата.

Ханс Петер Дошкоцил од Социјалдемократската партија повторно предложи формирање влада на стручњаци и распишување нови избори. СПО и Зелените повикаа ОВП да ги прекине преговорите со ФПО и да се сврти кон СПО и евентуално третата партија. Андреас Баблер од СПО истакна дека „раката на СПО е подадена“ и предупреди за опасноста од тоа десничарскиот лидер да стане канцелар со поддршка на ОВП.

Вернер Коглер oд Зелените ја предупреди ОВП дека ќе cноси „историска одговорност“ ако помогне ФПО да дојде на власт. НЕОС исто така изрази спремност за нови преговори, укажувајќи на можноста за поддршка на малцинска влада на ОВП.

Се очекува оваа недела да биде клучна за исходот на преговорите. Додека некои во ОВП веруваат дека ФПО ќе сака да ги заврши преговорите успешно, други се прашуваат каква ќе биде цената на таков договор.