Австрија е цврста во ставот да не избрзува со депортации на сириските државјани сѐ додека не дојде до „значителна и трајна“ промена на ситуацијата во Сирија, наспроти вербалната офанзива на политичарите, кои ги „бомбардираа“ социјалните мрежи со пораки за репатријација, прекинување на процесите за азил и укинување секој вид поддршка за бегалците.

Сиријците од Австрија со огромен собир во центарот на Виена го поздравија падот на режимот на Башар ал Асад во нивната земја, но политичарите, особено оние од десничарските партии, порачаа дека е дојдено времето десетиците илјади бегалци да се вратат во својата земја.

Министерството за внатрешни работи објави дека одлуката да се почека на репатријација е донесена во согласност со актуелните проценки на Федералната канцеларија за странци и азил поради ситуацијата во земјата зафатена со повеќегодишен конфликт. Извори од Министерството изјавиле за Австриската новинска агенција дека новата проценка ќе се спроведе во „тесна координација со европските партнери“.

Австрија не е единствената земја што во моментов не планира депортации во Сирија. Слично постапуваат и другите членки на Европската Унија, вклучувајќи ја Германија. Берлин, сепак, на веста за падот на режимот на Асад реагираше со замрзнување на обработките на барањата за азил од Сиријците.

– Нашата цел е да обезбедиме цврста основа за одлуките и да гарантираме дека депортацијата на сириските државјани ќе биде во согласност со важечките стандарди за човекови права – изјави портпаролот на Министерството за внатрешни работи.

Наспроти тоа, Либан, кој е дом за повеќе од 1 милион сириски бегалци, отвори процес за враќање одредени категории бегалци во Сирија, и покрај критиките од меѓународните организации. Во Турција, која прифати околу 3 милиони сириски бегалци, јавноста врши сѐ поголем притисок врз властите да почне враќањето на бегалците.

Во Австрија, Сиријците и понатаму поднесуваат најголем број барања за азил. Само во првите три месеци од годинава се поднесени 2.572 барања, додека во долгорочната статистика од 2015 година се наоѓаат на врвот со вкупно 90.404 поднесени барања, пред Авганистанците (84.803) и Индијците (23.683).

Според податоците од март годинава, 62 отсто од барањата за азил на сириските државјани во Австрија се решаваат позитивно, а 21 отсто се одбиени или класифицирани како „други“. Од почетокот на годината се донесени 904 негативни одлуки за Сиријците.

Во други земји од Европската Унија редовно се спроведуваат депортации врз основа на Даблинскиот договор, во кој е дефинирано дека за процесот на азил е одговорна државата во која лицето првпат влегло на територијата на ЕУ.

Министерството во Виена нагласи дека Австрија активно ќе го поттикнува доброволното враќање на бегалците, нудејќи логистичка поддршка и финансиска помош за повратниците, но дека присилна депортација е можна само ако постои правосилна одлука и ако враќањето може да се спроведе во согласност со Европската конвенција за човекови права и одлуките на австрискиот Управен суд.

Федералната канцеларија за странци и азил (БФА) континуирано го следи развојот на ситуацијата во Сирија, како и релевантните судски пресуди. Државната документација, која служи како основа за азилските процедури, редовно се ажурира за да се овозможи приспособување на секој поединечен случај.

– На овој начин тековните промени на ситуацијата можат да се земат предвид во сите фази на процесот на одлучување – соопштија од Министерството.