Австрија планира да купи 12 борбени авиони – лесни ловци „Аермаки М-346ФА“ од италијанско производство, за да ги замени авионите Сааб 105 кои беа пензионирани на крајот на 2020 година, соопшти денеска австриската влада.

Во соопштението се наведува дека австрискиот канцелар Карл Нехамер изјавил дека постигнувањето договор за купување на италијански борбени авиони покажала силна соработка меѓу Италија и Австрија, пренесе „Н1“.

Нехамер упати посебна благодарност до италијанската премиерка Џорџа Мелони, која, како што наведе, дала значаен придонес во склучувањето на тој договор.

Вкупната цена на договорот сè уште не е одредена, но за нив во буџетот се предвидени околу една милијарда евра.

Авионите ќе се користат за обука на пилоти и поддршка на копнените сили и воздушната одбрана, соопшти владата.