Австралискиот суд му наложи на јавниот радиодифузен сервис (ABC) да исплати дополнителна отштета на радиопродуцентка што ја отпушти поради известување за војната во Газа, пишува Скај њуз, Австралија.

Еј-би-си ја отпушти радио продуцентката Антоанет Латуф во декември 2023 година поради нејзините политички ставови, по интервенцијата на произраелските групи, пресуди судот претходно оваа година.

Причина за отказот е што новинарката на својот инстаграм-профил повторно објави видео од невладината организација „Хјуман рајтс воч“ (ХРВ) за војната во Газа, со коментар „ХРВ ја осудува употребата на глад како оружје на војната“.

Федералниот судија Дарил Рангија денес ѝ додели на Латуф 84.000 евра отштета, откако претходно во јуни Еј-би-си веќе исплати приближно 39.000 евра. Новата отштета мора да ѝ се исплати на новинарката во рок од 28 дена, а судијата објасни дека ја досудил за да се осигури дека „Еј-би-си ја научиле лекцијата“.

Еј-би-си, исто така, јавно ѝ се извини на Латуф, нагласувајќи дека ги разочарала и своите вработени и јавноста.

„Еј-би-си длабоко ја разочара австралиската јавност кога ги предаде правата на своите вработени (…) за да го смири лобито“, рече Рангија.

„Казната не е важна, за мене никогаш не стануваше збор за пари, туку за одговорност и кредибилитет на информациите што ни ги обезбедува нашиот јавен радиодифузер“, напиша Латуф на социјалните медиуми во вторникот.

Главниот извршен директор на Еј-би-си, Хју Маркс, рече: „Го сфаќаме ова прашање сериозно (…) мора да се справиме подобро“.