Австралија ќе набави 11 фрегати од класата Могами, произведени од јапонската компанија „Мицубиши хеви индастрис“ (МХИ), за 6 милијарди американски долари (5,2 милијарди евра), објави денес австралискиот министер за одбрана Ричард Марлес.

„Ова е очигледно најголемиот договор за одбранбена индустрија досега меѓу Јапонија и Австралија“, рече Марлес за време на прес-конференција во Канбера.

На тендерот, МХИ се натпреваруваше со германската група ThyssenKrupp Marine Systems. Компаниите од Шпанија и Јужна Кореја беа исклучени во претходните фази од процесот.

Австралија започна голема реорганизација на своите вооружени сили во 2023 година, особено за да стекне капацитети за погодување цели со многу поголем дострел и да се спротивстави на растот на кинеската моќ, особено на море.

Фрегатите со ниска видливост Могами, за кои се очекува да влезат во служба на австралиската морнарица до 2030 година, се планира да ги заменат застарените воени бродови од класата Анзак што влегоа во служба во 1990-тите. Тие се способни да лансираат крстосувачки ракети Томахавк со долг дострел.

„Фрегатата од класата Могами е најдобрата фрегата за Австралија“, увери Марлес. „Тоа е брод од нова генерација. Е – стелт (тешко може да се открие со радар). Има систем за вертикално лансирање со 32 ќелии, способен за лансирање ракети со долг дострел“, наведе тој.

„Набавката на овие фрегати ќе ја направи нашата морнарица поголема и посмртоносна“, додаде австралискиот министер за одбрана.