Италијанската авиокомпанија Алиталија објави дека ќе ги прекине сите летови од 15 октомври бидејќи престанува да постои. На оние што веќе купиле билети за летови по овој датум дадена им е можност да ги заменат со порани летови или да им бидат вратени парите.

Според весникот „Кориере дела сера“ од новонастанатата ситуација се засегнати околу 250.000 луѓе, пренесува Јуроњуз.

По затворањето на Алиталија, компанијата ќе биде преземена од нова компанија, државната ИТА (Италија Траспорто Аерео). ИТА започнува со продажба на билети денес, а ќе лета од 15 октомври. Авионите на Алиталија, нејзините слотови за аеродромите и другите средства ќе ги преземе ИТА.

Алиталија има 52 авиона, а ИТА планира зголемување на флотата и да има 105 авиони до 2025 година. Плановите се да лета од Рим и Милано до Њујорк, Бостон, Мајами, Токио и голем број европски градови.

Треба да се има предвид дека билетите резервирани и купени за Алиталија не важат за ИТА, која сѐ уште нема функционална интернет страница за продажба на сопствени билети.

Во врска со билетите, Алиталиа најави дека директно ќе контактира со секој од своите клиенти. Инаку, замената на билетите е бесплатна и важи само за истата дестинација за летови пред 15 октомври. Ако патникот сака да ја смени дестинацијата или да лета до истото место по 15 октомври тоа ќе го чини дополнително, а ако новата рута е поевтина, нема да добие надомест.

Италија со години се обидува да ја спаси банкротираната авиокомпанија и во 2017 година ја стави под контрола на доверителите на земјата. Во 2019 година – година пред пандемијата – превезуваше 21,3 милиони патници и до неодамна имаше повеќе од 10.000 вработени за кои не е јасно што ќе се случи по згаснувањето на компанијата.