Дваесет и девет градобијни палки, секоја со полнење од 400 грама сребрен јодит, завчера во периодот од 16:13 до 18:43 часот, се употребени за авионско засејување градоносни и потенцијално градоносни облаци. Градобијните палки биле употребени откако радарските центри Ѓуриште и Тополчани утврдиле опасност од појава на град.

Ракетите се истрелани од авион на аероклубот „Скопје“. Со авионско засејување со сребрен јодит и годинава се заштитуваат земјоделските посеви од град. Авионското засејување е извршено со три авиони од аероклубот „Скопје“ – велат од Министерството за земјоделство, шумарство и водостопанство.

– Новина е тоа што наместо две, на располагање имаме три летала, со што се очекува да се постигне добра покриеност на целата територија на Македонија и да се зголеми можноста за дејствување во повеќе региони што истовремено се зафатени од појава на град – велат од Министерството за земјоделство.

Овој метод на заштита е воведен откако анализата покажала дека лани имало натпросечен број денови со нестабилна облачност, при што се исфрлени вкупно 1.083 палки или 433 килограми реагенс за време од 180 часа лет на авионите.

Реагенсот што се користи е истиот што долги години се користел во системот за градобијна заштита. Според истражувањата на терен, градобијниот систем е помалку ефикасен бидејќи реагенсот не секогаш влегува во нестабилната воздушна маса, додека со авионското засејување на градоносните облаци авионот доаѓа во близина на ваков вид облаци и самите струи на облакот го вовлекуваат реагенсот во облакот.

Во просек во земјава се исплаќаат по околу три и пол милиони евра годишно за штети настанати од временски непогоди.

– Aко не се дејствуваше авионски, големи штети ќе имаше во повеќе региони – изјави по завчерашното невреме министерот за земјоделство, шумарство и водостопанство Љупчо Николовски.

Министерот рече дека благодарение на авионското засејување на облаците и дејствувањето на авионите во деновите од викендот на повеќе локации постигнат е ефект на заштита, односно намалување на штетите од околу 80 проценти.

Радарските центри Тополчани и Ѓуриште редовно ги следат градоносните облаци и врз основа на параметрите од радарската контрола, вчера и завчера беа активирани воздухопловите за авионско засејување на градоносните облаци.

Радарскиот систем за детектирање и следење облачни маси, кој долги години не работеше, е поправен и надграден. Системот располага со современи радарски контролни и мониторинг единици за управување, а надградениот радарски систем овозможува навремена прогноза на појавата на нестабилната воздушна маса од кој било правец.

Од државава изнесени неколку тони застарено РАКЕТНО ГОРИВО и друг ЕКСПЛОЗИВЕН материјал