Федерален судија во САД побара од Белата куќа да ги укине ограничувањата што ги наметна кон Асошиејтед прес, на кој му беше забрането присуство на брифинзи за печатот и разни настани на кои присуствуваше американскиот претседател, откако новинската агенција одлучи да не го менува начинот на известување за Мексиканскиот залив.

Судијата Тревор Мекфејден, назначен од Доналд Трамп за време на неговиот прв мандат, одлучи дека Белата куќа мора да им дозволи на новинарите на АП пристап до Овалната соба и претседателските авиони додека не се разгледа жалбата на новинската агенција против забраната што и е наметната.

Белата куќа почна да го ограничува пристапот на АП до различни настани на кои присуствуваше американскиот претседател, како и во Овалната соба и претседателскиот авион, откако агенцијата објави дека ќе продолжи да го користи терминот Мексикански залив, и покрај фактот што Трамп, со извршна наредба, го преименува регионот во Американскиот залив.

„Судот пресуди дека според Првиот амандман (заштита на слободата на говор на американскиот Устав), ако владата ги отвори вратите за некои новинари – без разлика дали се во Овалната соба, Источното крило или на друго место – не може да ги затвори тие врати за други новинари поради нивните ставови“, нагласи Мекфаден.

Во исто време, судијата додаде дека неговата одлука ќе стапи на сила во недела за да и даде време на американската влада да поднесе жалба. Конечната одлука на Мекфејден се очекува во наредните месеци.

„Денешната одлука го потврдува основното право на печатот и на јавноста да зборуваат слободно без владина одмазда “, рече во изјавата Лорен Истон, портпаролка на АП.

И Здружението на дописници на Белата куќа (WHCA) ја поздрави судската одлука.

„WHCA ја поздравува денешната одлука, која го поддржува основниот идеал на нашата земја, дека владата не треба да има можност да ги контролира независните медиуми“, нагласи тој.

АП објасни дека Мексиканскиот Залив го има ова име повеќе од 400 години, притоа посочувајќи дека промената на името од страна на Трамп се однесува само на САД, бидејќи другите земји и меѓународните институции не се придржувале кон тоа.

„Асошиетед прес ќе го нарекува со неговото оригинално име, притоа признавајќи го новото име што Трамп го избра“, нагласи агенцијата.

АП, основана во 1846 година и со повеќе од 3.000 вработени ширум светот, објави повеќе од 375.000 статии, 1,24 милиони фотографии и 80.000 видеа.

Откако Трамп се врати на американското претседателство, Белата куќа го ограничи пристапот до традиционалните, големи американски и меѓународни медиуми, давајќи им приоритет на претставниците на телевизиските мрежи, веб-страниците, подкастите и блоговите. Згора на тоа, од февруари, Белата куќа е таа што одлучува кои медиуми ќе покриваат брифинзи за печатот или ќе го придружуваат Трамп, со што се нарушува традицијата која бара оваа одлука да ја донесе WHCA.