Не може да се зборува за подобра или полоша понуда за набавка на гориво, во ситуација кога цената е регулирана од страна Регулаторната комисија за енергетика (РКЕ), оценува градоначалничката на Град Скопје, откако Бирото за јавни набавки соопшти дека ЈСП избрало неприфатлива понуда за набавка на гориво како најприфатлива.

Во интервју за Телма, кое целосно ќе биде емитувано попладне, Арсовска изјави дека појаснувањето на Бирото за јавни набавки за причината за поништување на набавката на гориво е небулозно.

Скопје без јавен превоз, граѓаните преку социјалните мрежи се организираат за превоз

-Таа е иста цена за сите, не може да биде поголема или пониска, не може да се наддава на таа цена затоа што цената е веќе одредена од Регулаторната комисија за енергетика – вели таа.

Критично, според градоначалничката е тоа што директорката на Бирото за јавни набавки ја донела одлуката за поништување на набавката сега и тоа што имала замерка што само една компанија дала понуда.

-Има замерка на тоа дека една компанија дала понуда, што е нормално, сите ги гледаат притисоците, ретко кој се охрабрува во претпријатие што е таков загубар да го снабдува со енергенс, и кога веќе се осмелил сметам дека е не само политички и неумесно, туку и штетно да се прават сега такви работи – вели Арсовска.

Како што појаснуваат од Бирото за јавни набавки, постапката за набавка на Еуродизел, објавена од ЈСП била предмет на управна контрола, при што било констатирано станува збор за неприфатлива понуда, а претпријатието и покрај јасните инструкции не ја искористило можноста ниту да ја оспори одлуката.

Од Бирото велат дека при управната контрола констатирано е дека оваа понуда, која била и единствена поднесена понуда во постапката, не исполнува услов кој самиот ЈСП го навел во точка 1.4.8 од тендерската документација. Тоа, како што се додава во соопштението, всушност е наведено и во самиот извештај од спроведена постапка на комисијата за јавна набавка во ЈСП.