Градоначалничката на Скопје, Данела Арсовска денеска од говорницата во Советот на градот постави прашање до советниците од редовите на ВМРО-ДПМНЕ зошто тие „30 пати во три и пол години не изгласале набавка на нови автобуси и зошто Владата уште ги нема набавено 120-те нови автобуси кои беа најавени од мај“.

„Тоа што во изминативе три и пол место да терате инат со цел град, со овие луѓе надвор кои на 40 степени чекаат нови автобуси коишто над 30 пати како одлука ви беа ставени на гласање и не ги гласавте, тоа треба да појасните вие зашто. Рековте во мај дека ќе има нови автобуси, а еве веќе септември е, а нема автобуси, и тоа треба да објасните зошто“, рече Арсовска.

Во однос на ЈСП, градоначалничката рече дека претпријатието работи „поконсолидирано од кога било“, а за паркираните автобуси кои се расипани и со години не се во функција, Арсовска изјави дека за тие автобуси нема ниту достапни резервни делови, ниту нивно производство.

„Сомнителни набавки нити имало, нити ќе има. Ревизии поминале и утврдиле дека тоа претпријатие во рамки на своите можности работи поконсолидирано од кога било. Тие автобуси за кои зборувате се паркирани од 2017 година и не се поправаат бидејќи некој набавил автобуси за кои нема резервни делови, ниту има производство“, додаде таа.