Косана Мазнева Николиќ од вчера не е повеќе директор на ЈП „Комунална хигиена“. Жената „херој“ како што до неодамна ја нарекуваше градоначалничката Данела Арсовска, по нешто повеќе од една година директорување, е разрешена токму од Арсовска. Причините за ваквиот потег на градоначалничката засега се непознати, освен дека се дава шанса на друг директор да ги реализира програмските определби на претпријатието.

Разрешената директорка, како што јавно изјавува, исто така не е информирана зошто повеќе не е на чело на комуналците, тврди дека во изминатиот период напорно работела и дека самата не побарала да замине од претпријатието. Досега нема објаснување што била грешката на Мазнева, на чие место е назначен Гоце Трајковски, човек непознат за јавноста.

Само три месеци претходно кога Скопје два дена остана затрупано во ѓубре поради штрајкот на „Комунална хигиена“ градоначалничката и даде целосна поддршка на Мазнева, која како што рече го направила тоа што ниеден маж не го направил во изминатите 30 – успеала да се справи со мафијашките структури во јавното претпријатие.

Оваа жена денес треба да ја поздравите сите и да кажете браво за тоа што го направи и браво за начинот на кој што се справи со целата ситуација. Нема повеќе мафијаши да уценуваат, нема повеќе политички структури тука да си играат ниту со здравјето ниту со животот на граѓаните – рече меѓудругото тогаш Арсовска.

Што се случи потоа и каде згреши сега веќе екс директорката на „Комунална хигиена“ не се знае. Во јавноста се шират разни шпекулации, но прецизен одговор нема. Градоначалничката денеска посочи дека не е загарантирана ниту една позиција.

Доколку не се реализира сето тоа што е програмска определба на Градот Скопје, ниту една позиција не е загарантирана, а тоа и го правиме во моментов, даваме шанса на некој за кој веруваме дека во следниот шестмесечен период, доколку се докаже, ќе има шанса да ги реализира нашите програмски определби, истакна градоначалничката Данела Арсовска.

На разрешувањето реагираа и советници во Град Скопје од редовите на ВМРО-ДПМНЕ.

Сега ВМРО и Советот не може да се виновни, зашто разрешени се „храбрата” од Комунална, како и послушните од другите претпријатија. Кои се причините? Да не е прашањето како да се дели рекетот од приватни фирми? Како да се вработуваат луѓе? – напиша на Фејсбук советникот Стефан Андоновски.

За советникот Малиша Станковиќ од СПМ изненадувачки е што градоначалничката сега се ослободува од кадрите кои таа ги постави.

Нели Арсовска влезе во конфликт со цела Коалиција за обнова на Македонија за да постави чесни и способни кадри?И сега ги разрешува? Што така? Или мора по некој, па макар и свој….Ај за Арсовска веќе е одамна јасно. Ама овие новиве што се нафаќаат, што мака имаат? – вели Станковиќ.

За две години мандат Арсовска смени и назначи нови 40-тина директори на јавни претпријатија и установи во надлежност на Град Скопје, повеќето без никакво објаснување.

Дека наскоро ќе има и нови смени говори и податокот дека пред две недели беа објавени огласи за избор на директори на пет јавни претпријатија – на ЈСП „Скопје“, „Градски паркинг“, „Лајка“,„Водовод и канализација“ и на јавната установа Младински културен центар.