Владата очекувала дека од градоначалничката на Скопје ќе слушне план за решавање на проблемите за централната власт да помогне во реализација на тој план. Министерот за локална самоуправа кој вели дека состојбата во Градот е очајна, порача дека од Данела Арсовска не слушнал ништо конструктивно.

„Очајна е состојбата во Градот, очајна е состојбата во јавните претпријатија и како генерален заклучок се донесе дека немањето комуникација помеѓу советничките групи во рамки на Градот Скопје е една фаза од препреките за реализација на проектите од страна на Градот. Затоа градоначалничката предложи до крајот на оваа недела да состави некаков план кој што пред се ќе биде презентиран пред советниците во рамки на Советот на Град Скопје, иако нашите очекувања не се големи, морам да признам, за жал“, порача Златко Перински, министер за локална самоуправа.

Владата даде рок до четврток, Арсовска да предложи план и да го презентира пред советниците.

„Мене ми е многу жал што состојбите во Градот Скопје се вакви какви што се. Како Влада можевме да одбереме и да не се мешаме во тековното работење на градот но сметаме дека како приоритет ни се скопјани и мораме на некој начин нешто заедно да придонесеме и да се вклучиме во решавањето на  нивните проблеми“, додаде Перински.

Конкретно се разговарало за две јавни претпријатија – „Комунална хигиена“ и ЈСП.

Проблемот во ЈСП ќе се продлабочи за две недели кога учениците ќе тргнат во училиште. Тогаш дополнително ќе се почувствува потребата од повеќе автобуски линии.

„Се надеваме на конструктивност, пред сè кон советниците и кон останатите политички чинители на ниво на Град Скопје од нивна страна, ние како влада секако стоиме на располагање ако на некој начин сметаат дека можеме да помогнеме согласно нашите законски ингеренции. Добро е да се напомене дека од страна на градот беше исто така аргументиран и фактот дека од претходната влада нема исплаќано средства од буџетот за превоз на студентите кон ЈСП и практично тоа е пречката за нормално функционирање на претпријатието. Согласно ребалансот оваа влада го исервисира практично долгот на јавното претпријатието делот на кредитната линија за набавка на автобуси. Се надеваме дека ќе имаме конструктивност, ќе имаме разбирање пред се на вработените во Град Скопје, пред се во рамките на Советот на Град Скопје, а ние како влада секако стоиме на располагање за се она што можеме во иднина да помогнеме, ќе помогнеме“, порача Перински.