Габаритните контејнери, кои пред две години беа поставени на пешачките и на велосипедските патеки покрај булеварите и поголемите улици низ Скопје, иако така требаше само привремено да бидат лоцирани, сѐ уште стојат на истите места. Целиот тој период велосипедистите мора да ги заобиколуваат, искачувајќи се на делот за пешаци, а реакциите на граѓаните за да им се најде посоодветно место досега не наидоа на одѕив, затоа што друго решение очигледно нема.

На овој проблем укажа и градоначалничката Данела Арсовска, која истакна дека со контејнерите што ги постави претходниот градоначалник, се соочуваат со проблеми и пешаците и велосипедистите.

-И за тоа има решение, значи тие решенија не треба да бидат ниту на пешачки ниту на велосипедски патеки – нагласи Арсовска говорејќи за контејнерите поставени пред две години.

Сепак, таа не посочи кое е решението за конечно да се ослободат велосипедските и пешачките патеки.

И велосипедистите очекуваат новото градско раководство најитно да го реши проблемот.

-Во врска со контејнерите поставени на велосипедските патеки, се надеваме дека според изјавите новата градска управа ќе почне веднаш со дислоцирање на контејнерите и сите останати пречки што го попречуваат континуираното, функционално и безбедно движење на велосипедистите – велат од граѓанската иницијатива „На точак“.

Дека дислокацијата на големите контејнери, кои се отвораат со нога, не е толку едноставна, говори и фактот дека единствен начин да се испразнат oд ѓубре со камионите наменети специјално за нив, е тие да бидат наместени до работ на тротоарот, што значи на патеките наменети за велосипедисти или за пешаци. Токму поради тоа привремениот режим за сообраќај воведен кога се поставија контејнерите стана траен режим.
Габаритните контејнери Градот, како што информираа при набавката оттаму, ги избрал како најсоодветни за Скопје, за потребите и навиките на граѓаните, а ги користат и жителите на Барселона и на Љубљана.

– Ги избравме овие контејнери поради техничките карактеристики што одговараат на потребите и навиките на граѓаните. Претходните контејнери имаа тркала, имаа капаци за отворање и затворање, имаа трипати помала кубикажа, немаа начин како да се отвораат со рака или нога. Автоматското затворање на капакот и помалиот отвор, значи дека во нив не може да се фрла кабаст отпад и друг несоодветен отпад. Немаат тркалца и не можат да се буткаат и преместуваат кому како му одговара – објаснија тогаш од Град Скопје.

Покрај тоа што велосипедистите бараат да им се ослободат патеките, тие се и против најавеното намалување на цената на паркинзите.

-Вложување во непрекината велосипедска инфраструктура стимулира користење велосипед. Намалување на паркинг-услугите за автомобили стимулира користење автомобил. Како овие две мерки воведени истовремено ќе влијаат на намалување на сообраќајниот метеж и бучава, намалување на загадувањето и зголемување на безбедноста на учесниците во сообраќајот? Која порака сака да ја пренесе Градот со овие мерки и што сака да постигне? Какво сообраќајно однесување стимулира кај граѓаните? – велат од „На точак“.

Како што е познато, Арсовска уште во својата изборна програма наведе дека цената за паркирање ќе се намали за 25 отсто на сите градски паркиралишта. Таа неодамна посочи дека за намалување на цената на паркинг е испратено барање и е отпочната процедурата, за што се чека одлука од управниот одбор на јавното претпријатие „Градски паркинг“, по што треба да се прифати пониска цена за услугите за паркирање.