Аранжманот со Британија е добар, оценува академик Абдулменаф Беџети во емисијата „Трилинг“ на ТВ „24“.

Тој вели дека секако треба да се видат другите важни компоненти, како рокот за отплата, каматната стапка, како и начинот и степенот до кој ќе можат да бидат ангажирани локални компоненти и компании во такви инфраструктурни проекти.

Одлуката на Владата да потпише договор со Велика Британија за заем кој може да достигне шест милијарди евра, предизвика многу полемики во јавноста. Наспроти Беџети, професорот Ванчо Узунов изрази мислење дека со заемот ја финансираме Велика Британија, а не Македонија.

„Ако сакаме развој, да ги вложиме сите пари во образованието. Тоа ќе биде вистинска капитална инвестиција. Патишта можеме и сами да изградиме. Проблемот на Македонија не е недостаток на пари, туку недостаток на квалитетно образование и реформи“, рече Узунов пред два дена во емисијата „Отворено“ на ТВ „24“.

Според Узунов, договорите со други држави се често нерамноправни, а британскиот заем може да стане уште едно задолжување без вистински ефект, како што беше случајот со унгарскиот кредит. Тој нагласи и дека реализацијата на проектите не зависи од политичарите, туку од администрацијата, која со години го нема капацитетот и потребните вештини.