Осудениот поранешен директор Управата за безбедност и контраразузнавање Сашо Мијалков доби условна казна за предметот „Плацеви на Водно, откако Апелацискиот суд денеска соопшти дека му ја уважил жалбата на пресудата со која беше осуден на една година и три месеци затвор. Во исто време, Апелација на поранешниот премиер Никола Груевски му ја зголеми казната за две години и тој сега во овој предмет е осуден на вкупно девет години затвор.

Во предметот „Плацеви на Водно“, Мијалков беше осуден за нелегално купување на имот во елитната скопска населба. Во тој случај со првостепената пресуда, Груевски, кој е избеган во Унгарија, доби седум години затвор. Покрај за нелегалното купување на плацеви на Водно, Груевски е осуден и за злоупотреба на партиските донации.

Во соопштението на Апелација е наведено дека судот ги одбил жалбите на Груевски, додека на Мијалков и на Основното јавно обвинителство за гонење на организиран криминал и корупција, делумно ги уважува. Во алтернативната казна на Мијалков – условна осуда е пресметано и времето кое тој го помина во притвор.

„Се определува дека таа нема да се изврши ако обвинетиот во рок од 4 – четири години- по правосилноста на пресудата не стори ново кривично дело“, е наведено во соопштението од Апелација.

Во образложението за условната осуда, од Апелација велат дека Мијалков не презел реални постапки во кривичното дело, туку само вербални.

„Советот оцени дека првостепниот суд го повредил член 24 од Кривичниот законик, во кој е наведено дека помагачот се казнува исто или поблаго од сторителот на делото. Имајќи го во предвид член 24 од Кривичниот законик и во сооднос и корелација на казните на Н.Г. од С. (кој е во бегство),, Ј.К: – една година затвор, Н.Ј. алтернативна мерка условна осуда, Р.Н. Алтернативна мерка – условна осуда директни сторители со конкретни дејствија и постапки,“ е наведено во соопштението.

Апелација смета дека во делот на пресудата за Груевски, Кривичниот суд не ги ценел доволно отежнатите околности и поради тоа ја уважил жалбата на Обвинителството со што му се зголемува казната од 7 на 9 години затвор.
Кога станува збор за конфискуваниот недвижен имот од осудените, Апелација ја потврди пресудата, со што имотот од 3 милиони евра ќе се префрли во сопственост на државата.

Кривичниот суд за предметот „Плацеви на Водно“ на една година и три месеци затвор го осуди Мијалков, прв братучед на Груевски и поранешен прв човек на УБК. Тој беше обвинет за „помагање при кривично дело перење пари и други приноси од казниво дело”. А на иста таква казна беше осуден и бизнисменот Орце Камчев, за перење пари. Тој во ноември лани излезе од затвор откако Кривичниот суд му ги спои двете казни за предметите „Плацеви на Водно“ и „ Империја“.

На условни казни затвор беа осудени Ристо Новачевски и Ненад Јосифовиќ, казна која според пресудата може да премине во затворска доколку направат ново кривично дело во следните пет години.

Според обвинението, во периодот од јуни 2006 до октомври 2012 година, Груевски како лидер на партија наместо да прикаже пари како примени донации во ВМРО-ДПМНЕ, за себе прибавил 1,3 милион евра, а потоа ги пуштал во оптек и купувал парцели на Водно. Станува збор за земјиште на кое имало шума, а кое со промените во Генералниот урбанистички план (ГУП) било пренаменето во градежно. Останатите беа обвинети дека му помагале при купувањето на плацевите.