Познатиот шпански актер Антонио Бандерас деновиве се наоѓа во Мадрид каде што се подготвува за премиерата на својот нов мјузикл „Gypsy“, но и покрај напорниот распоред и илјадници километри оддалеченост, неговите мисли се со ќерките кои живеат во Лос Анџелес.

Во своето последно интервју, 63-годишната ѕвезда на „Десперадо“ и „Зоро: Маскираниот одмаздник“, Антонио Бандерас, зборуваше за своите ќерки – 28-годишната Стела и 35-годишната поќерка Дакота Џонсон, кои секоја на свој начин, запловија во светот на филмот.

„Стела не е толку заинтересирана за глума. Таа сака да биде зад камерата и во тоа се пронајде. Таа веќе режираше неколку реклами и кратки филмови. Претпоставувам дека еден ден ќе сними и долгометражен филм, но премногу е срамежлива за да биде пред камерите“, откри Бандерас.

Како што рече, од друга страна, неговата поќерка Дакота Џонсон изгради успешна актерска кариера со улоги во филмови како „Педесет нијанси сива“ и „Мадам Веб“. Интересно е тоа што Дакота понекогаш му дава совети на својот „папи“, како што таа нагалено го нарекува.

– Неодамна се подготвував за една улога, па ја замолив Дакота да ми помогне околу текстот. Таа ми рече: „Во ред, папи, но внимавај, мислам дека малку претеруваш – низ насмевка се присети Бандерас.

Актерот не крие дека сака еден ден да глуми во филм со Дакота.

– Тоа би било големо задоволство за мене. Всушност, првиот филм во кој таа се појави беше „Луди во Алабама“, кој јас го режирав. Таа имаше само седум години и беше одлична, ги следеше упатствата и правеше сè како што треба.

Бандерас исто така потсети дека на истиот сет била и тукушто родената Стела.

– Таа беше вистинска кралица на драмата. Секогаш кога ќе кажев „акција“, таа почнуваше да плаче – низ смеа раскажа актерот.

Во тој филм од 1999 година, поранешната сопруга на Бандерас, Мелани Грифит ја играше главната улога и заедно се погрижија снимањето да биде забавно искуство за нивните деца.

И покрај бројните професионални успеси, вклучувајќи ги неодамнешните филмови „Babygirl“ со Никол Кидман и „Paddington in Peru“, како и претстојната реклама за Супер Боул, Бандерас нагласува дека неговата улога на татко и понатаму останува најважна во неговиот живот.