Од Асоцијацијата на спортски обложувалници реагираат на тоа што новиот Закон за игри на среќа во Собранието се носи со европско знаменце, без дебата. Законот, според нив, ќе предизвика сериозни последици по буџетот, а без работа ќе останат 10.000 луѓе.

„Како е можно, Владата без дебата, без основна финансиска анализа и импликации од законот, без конкретни докази за ефектите од законот, да сака да протурка нешто што ќе биде колапс на индустријата? Овој закон ќе има страшни последици по буџетот и вработувањата, односно ќе значи оставање на улица 10.000 вработени, играње на црно и враќање на сивата економија на голема врата, и ова го имаме како доказ од регионот конкретно од Албанија“, вели Васко Илијевски од Асоцијацијата на спортски обложувалници.

Од движењето „Антикоцкање“, пак, велат дека треба што поскоро да се изгласа законот, кој практично не е нов, оти стоел во собраниските фиоки повеќе од две години.

Со законот ќе ги спасиме младите од коцка која е сериозна закана за нив.

„Овој закон две години стои во фиока во собраниската комисија за финансии и тој закон две години се блокира од претседателот, не можеме ние цел живот да чекаме, а некој да го блокира законот. Едноставно беше дојдено време да се интервенира и народот да се спаси од овие валкани игри, што тие ги нарекуваат игри на среќа. Овие игри носат несреќа, а не среќа и затоа треба да се изгласаат законот со европско знаме што поскоро. Од градовите да се остранат овие игри на среќа, крајно време е затоа што младината не случајно ни бега. Околу сите школи има по неколку спортски обложувалници, ние како ќе ги браниме децата“, вели Јуши Емурлаи од Движењето Антикоцкање.

Оттаму додадоа дека ако не се донесе законот, најголеми работодавци во државата ќе станат „коцкарите“.

„Ова не е игра на среќа, животот не е коцка, затоа бараме законот да се донесе. Овие 10.000 луѓе кои работаат во казината и обложувалниците за кои велат дека ќе останат на улица, ние кога сме почнале со движењето Антикоцкање биле 1000 луѓе, сега се 10.000 ако се продолжи вака ќе бидат и 100.000 луѓе вработени во овој сектор. Ние како држава ќе станеме коцкарска држава. Со премиерот кога сме имале средба сме барале начин за луѓето кои сега работаат во спортските обложувалници и казината државата да се погрижи за нив за да се вработат, вели Јуши Емурлаи од движењето Антикоцкање.

Предлог-законот за игри на среќа предвидува просториите во кои се приредуваат игрите на среќа да бидат оддалечени од училиштата не помалку од 500 метри.