Женската младинска кошаркарска репрезентација на Македонија не успеа да обезбеди пласман во полуфиналето на Европското првенство Б-дивизија што се одржува во Скопје откако во четвртфиналето загуби од Словенија со 63:36.

Селекторката Јелена Антиќ е реална во очекувањата, но исто така порачува дека е потребна многу работа за кревање на квалитетот на женската кошарка.

– Игравме против селекција која ќе се бори за највисок пласман на првенството. Едноставно кажано, Словенките се поквалитетни од нас. Имаат одлична композиција на тимот, секој играч знае да си ја работи својата задача. Имаат и добра тимска игра, долг ростер, се што треба да има една репрезентација која атакува на висок пласман, и е без пораз. За нас ова е едно огромно искуство. Да видиме до каде сме во овој момент против вака силни селекции кои извесно е следната сезона ќе бидат дел и од онаа најелитна конкуренција во женската кошарка. Колку што ме радува резултатот кој го реализиравме на овој шампионат, толку морам да изразам и извесна доза на загриженост. Имаме доста работа пред нас, особено во овој младински сегмент од нашата женска кошарка. Евидентно е дека  заостануваме во многу работи на кои во иднина мора да се посвети поголемо внимание. Ни недостасува еден континуитет на настапи на вакви натпреварувања, и уште поголема поддршка, од сите фактори. Особено тоа се однесува на клубовите – вели Антиќ која смета дека е извлечен максимумот во овие услови.

– Едноставно имаме свој лимит, дадовме некој наш максимум. Но секогаш може и мора повеќе. Јас размислувам на еден таков начин, и како играч, сега и во улога на селектор, и нема да се откажам од тоа. Тоа и ги учам овие млади кошаркарки со кои работам во изминатите денови. Мислам дека дојдовме до едно компетитивно ниво. Но ни треба уште повеќе за да направиме уште еден исчекор. Не ни очекував дека ќе биде лесно кога решив да ја работам и оваа работа. И така е, не е лесно. Но нема откажување. Продолжуваме понатаму, со надеж дека ќе бидеме уште подобри.

До крајот на ЕП, Македонија ќе одигра уште два натпревари за пласман од петтото до осмото место.