Движењето „Антикоцкање“ денеска во салата на Советот на Општина Тетово организираше настан на кој пред присутните даде предлог Општина Тетово да организира референдум со едно прашање: „Дали сте за оддалечување на сите објекти кои приредуваат игри на среќа од училишта и верски објекти“.

Ваквата иницијатива следува откако, како што велат од движењето „Антикоцкање“, Собранието го повлекло новиот предлог закон за игри на среќа, во кој стои дека сите објекти каде се приредуваат игри на среќа да бидат оддалечени најмалку 500 метри од воспитно-образовни објекти, како и од верски објекти.

„Сите сме сведоци дека ситуацијата е аларманта со објектите на игри на среќа, се работи за цела држава, но за жал намерното лошо менаџирање нѐ доведува во ситуација ние да бараме решение. Не се работи само за Општина Тетово, туку ќе почнеме од Тетово и ќе продолжиме со организирање на референдуми и во другите општини, за еднаш-засекогаш да се реши проблемот со игри на среќа. По убиството кое се случи во една коцкарница ние бараме затворање на сите објекти на игри на среќа, сѐ до донесување на закон што ќе биде добар за сите“, вели Џемал Абдиу од движењето „Антикоцкање“.

Ќебир Авзи, професор на Правниот факултет на Државниот универзитет во Тетово, вели дека референдумот, доколку се организира, ќе биде факултативен, нема да има обврзувачки карактер, оти Македонија е унитарна држава и сите закони кои би го донело Собранието треба да важат на ниво на цела држава, а во случајов би се работело за референдум на кој ќе гласаат само граѓаните на Тетово.

Но, целта е да се прати порака дека граѓаните се против објекти каде се приредуваат игри на среќа, а со тек на време потоа може да се организира и референдум на ниво на цела територија, додава професорот Авзиу.

„Кога на цела територија ќе се организира ваков референдум, каде граѓаните ќе бидат против, тогаш Владата ќе размисли дали ќе ги поддржува казината или не. Целта наша е таа, ние да и предложиме на општината да се организира ваков референдум од факултативен карактер. Ние сакаме во Тетово ова да го организираме, за да има влијание и на ниво на цела територија, нормално ако не поддржи општината, оти тоа ќе носи и финансиски импликации за општината“, вели Авзиу.

Од движењето „Антикоцкање“, сметаат дека голем дел од буџетот на државата се полни со даноците на објектите каде се приредуваат игир на среќа. Но, додаваат дек „тие пари треба да останат во џебот на граѓаните, оти државата ни стана Лас Вегас и црна дупка на Балканот“.