Ансу Фати, некогашен голем талент на Барселона, би можел да го засили Монако ова лето.

Се очекува играчот, кој важеше за најголем талент на шпанскиот фудбалски гигант пред Ламин Јамал ​​да се појави на големата сцена, оваа недела да ги помине медицинските прегледи и да потпише за францускиот клуб.

Станува збор за позајмица, но Монако би имал опција потоа да го откупи договорот на Фати од Барса.

Со 16 години и 304 денови, Фати беше најмладиот стрелец во историјата на Барселона и веќе се сметаше за наследник на Лионел Меси, но по неколку ветувачки сезони, тој падна во втор план на „Камп Ноу“.

Минатата сезона тој настапи само на шест натпревари и јасно е дека не е во планот на тренерот Ханси Флик.

Затоа, преселбата во Монако би можел да биде можност за 23-годишниот напаѓач да ја оживее својата кариера по долг период на стагнација.