Фудбалерот на Манчестер Сити и репрезентацијата на Англија, Џон Стоунс ќе паузира подолг период, а тоа значи дека нема да биде на располагање на селекторот Герет Саутгејт за натпреварот против Македонија кој за 11 дена се игра во Скопје.

Стоунс сезоната ја започна со повреда на колкот и поради тоа ги пропушти првите седум натпревари од сезоната, сега станува збор за повреда на мускулот. Гвардиола има проблеми со одбраната бидејќи повреден е и Мануел Аканџи.

„Аканџи имаше проблем со грбот. Не знам што се случи, но тој не можеше да игра. И Џон повторно се повреди. Навистина ми е жал за него, бидејќи е голем професионалец. Ова е голем удар за нас. Стоунс е многу важен член на тимот. Но, сезоната е долга и тој ќе се врати уште посилен“, изјави Гвардиола по вчерашниот натпревар на Манчестер Сити.

Засега не е познато кога точно ќе се врати на терените, но со сигурност ќе ги пропушти натпреварите на Англија со Малта и Македонија, како и дербито против Челси кое се игра во викендот кој следи.