Фудбалерот на Тотенхем Џејмс Медисон отпадна од списокот на репрезентацијата на Англија за Европското првенство во Германија.

Англискиот селектор Герет Саутгејт има рок до петок да го достави конечниот список со играчи за ЕП, а тамошните медиуми откриваат дека тој веќе пречкртал едно од седумте вишок имиња. Медисон нема да биде дел од континенталниот собир.

Медисон одигра подготвителен натпревар против Босна и Херцеговина, но не успеа да го импресионира Саутгејт.

Неговата конкуренција е пеколна. Англичаните ги имаат Џуд Белингем, младиот Кол Палмер, Фил Фоден, Еберечи Езе, па одлуката на селекторот беше логична.

Медисон беше дел од тимот на Светското првенство во Катар во 2022 година. Оваа сезона во дресот на Тотенхем одигра 28 натпревари, постигна четири гола и забележа девет асистенции.

ЕП во Германија ќе се игра од 14 јуни до 14 јули, а Англија е во групата „Ц“ заедно со Словенија, Данска и Србија.