Иако полицијата неколку денови ги предупредуваше навивачите да не се собираат, никој не можеше да ги запре навивачите на Ливерпул да ја прославата шампионската титула, прва по пауза од 30 години.

Фудбалерите на Ливерпул во последниот натпревар на домашен терен со 5:3 го совладаа Челси и потоа го добија шампионскиот пехар, а откако капитенот Џордан Хендерсон го крена пехарот започна славењето помеѓу фудбалерите, но и на навивачите кои се собраа пред „Енфилд“ и заборавија на тоа дека треба да се одржува социјална дистанца поради пандемијата на коронавирусот.

– Знаете ли колку долго го чекам овој момент. Го чекав сиве овие години откако бев дете и сега штом не можам да бидам на стадионот, тогаш можам да бидам пред него. Изгледа дека полицијата не остави на раат што е добра работа. Секој навивач на Ливерпул во светот во овие моменти би сакал да биде на „Енфилд“. Но, ова е најблисклу што можеме да бидеме – изјави еден навивач на Ливерпул.

Навивачите почнаа да се собираат уште пред почетокот на натпреварот, а еден од нив дури изнајми приватен авион за да прелета преку стадионот со порака „Честитаме шампиони“.

Ливерпул не е единствениот англиски град во кој бурно се прославуваше. Бучно беше и на улиците во Лидс откако екипата по пауза од 16 години се врати во Премиер лигата. Лидс уште пред пет дена го обезбеди пласманот, но дури по одигрување на вчерашното последно коло беше прогласен за шампион на Чемпионшип по што околу 2.000 навивачи се собраа пред „Иланд роуд“ стадионот за да прослават.

Се славеше и во Бирмингем кој исто така обезбеди пласман во Премиер лигата. Дел од фудбалерите излегоа на паркингот во близина на стадионот за да ги поздрават навивачите и заедно почнаа да пеат.

Англиските медиуми ги проследија овие настани но не реагираа и не бараат строги казни како што е случајот со спортистите ширум светот кои не ги почитуваат препораките за заштита од коронавирусот.