Советот на Град Скопје на денешната вонредна седница едногласно донесе одлука за давање помош на настраданите од катастрофалниот земјотрес во Турција и Сирија во вкупен износ од 6 милиони денари, односно по 3 милиони денари за секоја држава. Помошта ќе се реализира преку уплата на средствата на Фондот на солидарноста на Црвениот крст .

Советниците на седницата изразија искрено жалење за катастрофата која му се случи на населението во овие земји и сочувство за настраданите.

Страшо Ангеловски, советник од ВМРО-ДПМНЕ и коалицијата, рече дека со одлуката која ќе се изгласа само ќе се испере сопствената совест, затоа што сите знаат дека помошта во Сирија нема да стаса.

За жал средствата во Сирија нема да стасаат, затоа што сѐ уште ништо нема во Сирија стасано, свифтот е забранет, односно пари не можат да стигнат, а тоа е заради санкциите и заради рестриктивните мерки на евроатланските партнери и нивните вредности кон кои се стремиме. Секако дека ќе го изгласаме, јас ќе бидам прв кој ќе гласа за ова, но дајте да се заложиме тие и такви вредности да не важат барем во време кога народите страдаат, без разлика дали припаѓаат на сирискиот, на францускиот, на овој или на оној народ. Луѓето се луѓе – рече Ангеловски