Академијата на Манчестер јунајтед со децении претставуваше симбол на континуирана продукција на таленти, но само две недели пред стартот на новата сезона, клубот се соочува со можност да ја прекине една од најимпресивните традиции во европскиот фудбал.

Имено, најтрофејниот англиски клуб држи рекорд од 4.321 последователни натпревари, уште од 1937 година на кои барем еден фудбалер израснат во младинската школа бил дел од тимот. Но, според актуелната состојба, оваа низа може да заврши на 17 август, кога „црвените ѓаволи“ го отвораат шампионатот против Арсенал.

Летово, Маркус Рашфорд замина на позајмица во Барселона, Алхандро Гарначо не е во плановите на новиот менаџер Рубен Аморим и е на пат кон нов клуб, додека искусниот Џони Еванс се пензионираше.

Се уште постои надеж дека младиот Коби Мејно ќе добие шанса, но неговата нестабилна здравствена состојба и склоност кон повреди и картони може да биде причина за крај на долгата традиција.