Водачот на проиранската вооружена група што учествувал во нападите врз американските сили денеска е убиен во Ирак во напад на американските сили, пренесува Франс прес.

„Нападот беше чин на самоодбрана. Нема повредени цивили. Нема погодени објекти“, рече неименуван американски претставник.

Агенцијата АП претходно објави дека високиот командант на ирачките вооружени формации поддржани од Иран е убиен  во напад од група шиитски единици во Багдад.

Нападот беше извршен за време на зголемени тензии на Блискиот Исток, поттикнати од војната меѓу Израел и палестинскиот Хамас и стравувањата дека конфликтот може да се прелее во околните земји. Ирачките власти бараат коалициските сили предводени од САД да ја напуштат земјата.