Американскиот секретар за одбрана Лојд Остин бил хоспитализиран на 1 јануари поради постоперативни компликации и уринарна инфекција откако се оперирал од рак на простата во декември, објави Националниот воено медицински центар Волтер Рид, пренесува Си-Ен-Ен.

Во соопштението стои дека ракот бил откриен на почетокот на декември, а Остин е опериран на 22 декември.

Неговиот рак на простата е откриен во рана фаза и прогнозата за негово заздравување е одлична.

На 1 јануари, Остин бил повторно примен во болница со компликации „вклучувајќи гадење со силна болка во стомакот, колкот и нозете“ и било откриено дека има „инфекција на уринарниот тракт“.

Функционерите за национална безбедност, па дури и заменик-секретарот за одбрана Кетлин Хикс – која ја презеде функцијата на Остин, не знаеле за хоспитализацијата на секретарот за одбрана.

„Никој во Белата куќа не знаеше дека секретарот Остин има рак на простата до утринава, а претседателот беше известен веднаш потоа“, изјави за новинарите попладнево по локално време портпаролот на Советот за национална безбедност Џон Кирби.