Сенаторот на американската сојузна држава Арканзас, Том Котон негира дека САД во суштина се расистичка земја, опишувајќи го ропството како „неопходно зло“, врз кое е изградена американската нација, пренесува Би-Би-Си во понеделникот.

Котон за еден локален весник рекол дека го отфрла тврдењето дека САД се „системски расистичка земја во своето јадро“.

„Ние мора да ја проучуваме историјата на ропството и нејзината улога и влијание врз развојот на оваа земја затоа што во спротивно не можеме да ја разбереме нашата сопствена земја“, изјавил тој за весникот „Арканзас Демократ Газет“.

„Како што рекоа основачките татковци, тоа беше неопходно зло на кое се градеше унијата, но на некој начин, како што рече Абрахам Линколн, тоа ропство е конечно искоренето“, рекол Котон.

Сенаторот е остар критичар на протестите што избувнаа низ целата земја по смртта на афроамериканецот Џорџ Флојд во Минесота, жртва на полициската бруталност.

Тој, во колумна на „Њујорк Тајмс“, ги нарекол протестите „оргии на насилство“ и го поддржал претседателот Доналд Трамп да ја искористи војската за да ги задуши немирите.