Американскиот јутјубер Тревор Џејкоб, кој намерно урнал спортски авион за да добие што е можно повеќе прегледи, се соочува со затворска казна од 20 години, пренесува „Би-Би-Си“.

Американските обвинители соопштија дека Џејкоб ќе се изјасни за виновен за кривични дела уништување и прикривање со намера да ја попречи федералната истрага за чистење на местото на несреќата.

Признавајќи се за виновен, Џејкоб изјавил дека видеото е дел од договор за спонзорство на производ.

Тревор Џејкоб, 29-годишен пилот, објави видео од авионската несреќа на „Јутуб“ во декември 2021 година, велејќи дека тоа е несреќа. До денес, таа објава собра речиси три милиони прегледи.

Во ноември 2021 година, Џејкоб полетал од аеродромот во Санта Барбара, Калифорнија со соло лет, со камери поставени на авионот. Заедно со камерите со себе понел падобран и селфи стап.

Тој „немал намера да стигне до својата дестинација, туку планирал да се катапултира за време на летот и да се сними како скока со падобран на земја и неговиот авион се урива“, соопшти американското обвинителство за Централниот округ на Калифорнија.