Епидемијата на коронавирусот која ја предизвикува болеста Ковид-19 брзо се шири во САД, а со неа и недостатокот на заштитни маски за лице N95, пренесува „Србија данас“.

Станува збор за маски кои до неодамна се користеа за заштита од штетни честички смог, издувни гасови, гасови од согорување и прашина. Резервите на заштитни средства во САД полека исчезнуваат, па многу граѓани се принудени сами да се снаоѓаат.

Милиони Американци шијат заштитни маски од рециклирана ткаенина и други материјали. Експертите велат дека алтернативните методи не се доволно ефикасни, но можат да спречат ширење на одредени бактерии. Сепак, маските од домашно производство не се дизајнирани да го спречат пренесувањето на коронавирусот.

– Единственат амаска која Центарот за контрола и превенција на болести (ЦДЦ) во САД ја признава како ефикасно заштитно средство е маската Н95. Сите други направени во домашни услови може да служат како заштита од допири на лицето со раце. За време на кивање или кашлање вирусот може да помине дистанца од околу шест метри. Доколку сте здрави, маската не е од пресудно значение за спречување на болеста – наведува капетанот Мајк Дојл.

ЦДЦ на САД советува дека најдобра превенција е спречување на изложеност на вирусот. Тоа пред сѐ се однесува на директни контакти меѓу луѓето и социјална дистанца. Исто така, треба да се избегнува допирање на устата, носот и очите, а една од најзначајните мерки за превенција е темелно миење на рацете со топла вода и сапун во време од најмалку 20 секунди.

Маските кои граѓаните сами ги прават можеби потсетуваат на хирушките, но не ги задоволуваат стандардите како N95.

– Маската има улога да го контролира ширењето на вирусот и контаминацијата на околината за време на кашлање и кивање. Пациентите кај кои е потврдена болеста или се сомневаат дека имаат Ковид-19 мораат да носат заштитни маски се до заминување во изолација – велат од ЦДЦ.

ЦДЦ на САД советува дека здравите лица не мора да носат маска, освен ако не се грижат за заболен од коронавирус.

– Заштитните маски треба да се сочуваат, бидејќи им се потребни на медицинските работници – стои во соопштението на организацијата.

Маските N95 стануваат дефицитарна роба во САД. Нивната цена константно расте, а официјалните лица се трудат да создадат резерви кои се неопходни на медицинскиот персонал ширум земјата.