Американските и руските официјални лица нема да разговараат за политички и безбедносни прашања, ниту за војната во Украина на состанокот во Истанбул утре, изјави портпаролот на Стејт департментот.

Исто така, неименуван функционер во американската амбасада во Анкара изјави дека двете делегации ќе разговараат за прашања кои влијаат на работата на дипломатските претставништва на двете страни, пренесува Ројтерс.

Делегации на Русија и САД утре ќе одржат технички разговори во Истанбул, соопшти денеска турското Министерство за надворешни работи.

„Како што постојано повторивме, Турција е подготвена да обезбеди секаков вид поддршка“, рече портпаролот на турското Министерство за надворешни работи, објави претходно Ројтерс, истакнувајќи дека учесниците, точното време и локацијата на состанокот сè уште не се објавени.

Рускиот министер за надворешни работи Сергеј Лавров претходно денеска изјави дека утре во Истанбул ќе се одржи руско-американска средба за нормализација на работата на амбасадите на двете земји.

Тој посочи дека врз основа на резултатите од таа средба ќе биде јасно колку брзо и ефикасно ќе можеме да „одиме напред“, пренесува Танјуг.