Американските сили денеска уништија проектил на јеменските бунтовници хути, поддржани од Иран, што претставувал „непосредна закана“ за авион на Вашингтон, соопшти американската војска.

Американските сили „погодија и уништија ракета земја-воздух на хутите, подготвена за лансирање“, откако утврдија дека таа „претставува непосредна закана за американски авион“, се вели во соопштението на Централната команда објавено на социјалните мрежи.

Јеменските Хути, кои се поврзани со Иран, ќе продолжат да ги гаѓаат американските и британските воени бродови во Црвеното Море во самоодбрана, изјави воениот портпарол на групата.

Во изјавата, која ја пренесе јеменската телевизија „Ал Масира“, се додава дека оваа исламистичка организација истрелала проектили врз американскиот воен брод „Ју-Ес-Ес Гравели“.