Министерството за внатрешна безбедност на САД предупреди на „зголемени закани“ во земјата, наведувајќи ја можноста за „сајбер напади од ниско ниво“ и можноста за индивидуални физички напади, по нападот врз Иран.

Во предупредувањето, издадено од Националниот систем за советување за тероризам, се вели дека проиранските „хактивисти“ веројатно ќе ги нападнат американските интернет мрежи и дека други поврзани со иранската влада би можеле да извршат слични напади, јавува Си-Ен-Ен.

Што се однесува до можноста за физички напади, Министерството за внатрешна безбедност соопшти дека доколку иранските лидери „издадат религиозен декрет“ со кој ќе повикаат на одмаздничко насилство против американски цели, тоа „веројатно ќе ја зголеми“ веројатноста дека „насилните екстремисти“ во САД сами ќе се мобилизираат за насилство.

„Конфликтот би можел да мотивира и насилни екстремисти кои сакаат да нападнат цели за кои се смета дека се еврејски, произраелски или поврзани со американската влада или војска во САД“, се вели во предупредувањето.

САД рано утрово бомбардираа три нуклеарни објекти во Иран, придружувајќи се на Израел во нападот врз нуклеарните и воените постројки во таа земја на 13 јуни.