Администрацијата на американскиот претседател Доналд Трамп укинува повеќе од 500 работни места во Агенција за глобални медиуми, одговорна за „Гласот на Америка“ и другите странски медиуми финансирани од владата, изјави претставникот за медиуми на администрацијата, Кари Лејк.

Лејк го објави овој потег еден ден откако федерален судија ја блокираше нејзината одлука за разрешување на Мајкл Абрамовиц од функцијата извршен директор на ВОА, јавија американските медиуми.

Според пресудата, Абрамовиц не може да биде разрешен од функцијата без одобрение на мнозинството од Меѓународниот советодавен одбор за јавни радиодифузери, па поради тоа неговото разрешување е спротивно на законот.

Лејк во објава на социјалните мрежи истакна дека  нејзината агенција започнала процес на намалување на работната сила, што ќе резултира со укинување на 532 работни места. Според неа овие чекори ќе придонесат за подобро функционирање на медиумската агенција, така што Гласот на Америка повторно ќе биде слушнат во странство и таму каде што е најважен.