САД дозволуваат американските граѓани кои останале во трети земји поради пандемијата и чии патни документи се со истечен рок, да се вратат дома со истите документи, соопштија денеска од американскиот Стејт департмент.

– Благосостојбата и безбедноста на нашите граѓани е највисок приоритет на Стејт департментот. За да се намалат тешкотиите при патување и досега невидените редици создадени од глобалната Ковид-19 пандемија, работиме заедно со Министерството за внатрешна безбедност на олеснување на враќањето на американските граѓани во САД, се вели во соопштението.

Се наведува дека американските граѓани кои моментално се наоѓаат во странство а чии патни документи се со истечен рок на или после 1 јануари 2020 година, можат да го користат својот пасош со истечен рок за директно патување назад во Соединетите Држави до 31 декември 2021 година“.

Оттаму соопштуваат дека потребно е да бидат исполнети некои услови, а граѓаните можат да потврдат дали се квалификуваат за патување назад со пасош со истечена дата на важност на сајтот travel.gov.

Се наведува дека царинско-пограничната контрола на САД ќе им асистира на сите американски граѓани кои биле погодени од долгото чекање ред во американските амбасади и конзулати, а предизвикано од пандемијата на Ковид-19.

– Пасошите со неодамна истечен рок не можат да се користат за патување од САД на меѓународни правци во странска земји, посочуваат оттаму.

Стејт департментот уште еднаш испрати препорака до американските граѓани да ги одложат своите планови за патување во странство ако тоа е можно. Исто така, се потсетува дека за оние кои се враќаат во земјата со авионски летови потребен е доказ за негативен резултат од Ковид-19 тест извршен не подолго од 72 часа пред поаѓањето за САД.