Се очекува оваа недела во делови од Флорида да има „валкан дожд“. Ова се случува кога ситните честички од песочните бури, пожарите или загадувањето се фатени во капки дожд. Во случајот на Флорида, огромен облак од сахарски песок, пренесен од источните ветрови преку Атлантскиот Океан, се среќава со стандардните летни бури, што резултира со тенок слој на нечистотија на надворешниот мебел, прозорците, автомобилите и другите површини.

Прашината на валканиот дожд може да ги затне и клима-уредите, па жителите на Флорида можеби ќе треба да ги исчистат. Валканиот дожд е неформално име, а не техничко, објави „Форбс“ Србија. Тоа е облак од екстремно сув, правлив воздух што се формира над Сахара во Северна Африка во доцна пролет, лето и рана есен. Ветровите често го носат добиениот топол, правлив облак на запад до Флорида, па дури и до Тексас.

Прашината обично формира слој на околу километар и половина над површината на Земјата и зафаќа простор дебел од три до четири километри. Овогодинешниот бран е еден од најголемите досега забележани во јули, пренесува Фокс35 Oрландо. Следниот ќе помине низ Јужна Флорида во вторник и рано во среда. Топлината, сувоста и силните ветрови можат да го потиснат формирањето на тропски циклони и да спречат засилување на бурите. Но покрај тоа, тие создаваат импресивни изгрејсонца и зајдисонца.