Луѓето се возат со автомобили во недостиг на функционален јавен превоз и тоа е факт. Таму каде што функционира јавниот превоз, нема потреба од толку автомобили. Дали вие здраворазумно можете да заклучите дека ние не можеме да тргнеме во насока во решавање на јавниот превоз? Тоа се некои прашања кои градови ги решавале пред 150 години. Јас верувам, уверен сум дека во Скопје, со конкретна политичка волја, може да се реши проблемот со јавниот превоз. Ние имаме и концепт како тоа да го направиме, вели Амар Мециновиќ, кандидатот на Левица за градоначалник на Град Скопје.

Во интервјуто за „Слободен печат“, Мециновиќ истакна дека како градоначалник на Скопје сериозно ќе се зафати со решавањето на сообраќајниот метеж и намалувањето на аерозагадувањето.

– Во следниот мандат ние сакаме да одиме во насока Скопје да стане град во кој нема да има потреба да се возиш со автомобил. Пред сè автобуските линии што сега го опслужуваат градот се анахрони. Тие линии се поставени пред многу децении и не одговараат на сегашната поставеност на работите во градот. Ние сметаме дека се потребни помал број автобуси отколку што Скопје има моментално, само тие треба да бидат нови и треба да бидат модерни за нашите граѓани достоинствено да се возат во јавен превоз, а не во стари автобуси кои се дури опасност по нивната сигурност. Втората страна на работите е алтернативен превоз кој ќе го понудиме, за што зборуваме од 2022 година, а тоа е превоз кој ќе ја вклучи и постоечката железничка инфраструктура – вели тој.

Мециновиќ се осврна и на работењето на Јавното сообраќајно претпријатие (ЈСП), за кое вели дека функционира како картичка за банкомат на актуелната владејачка гарнитура во главниот град.

– Една од многу проблематичните работи со ЈСП е тоа што во статутот има можност да функционира како маркетинг агенција. Што значи тоа? Дека претпријатието може да стопанисува со рекламниот простор кој го има, а тоа е рекламниот простор на постојките на ЈСП или на самите автобуси, а ако размислиме дека тоа се подвижни реклами кои се движат на пример на оската Ново Лисиче – Ѓорче Петров, значи дека е неверојатно атрактивен рекламен простор. Моментално ЈСП не стопанисува со својот рекламен простор, туку со него стопанисува „Маратон“. Тоа е маркетинг агенција, со што се прави потценување на луѓето вработени во јавните претпријатија дека тие самите не знаат како се работи. И така се кочи самото претпријатие. Ние сметаме дека треба да се стави крај на раситнувањето на услугите кои треба да ги генерираат претпријатијата кои се во ингеренција на град Скопје – додава Мециновиќ.

Што се однесува до аерозагадувањето, Мециновиќ ветува дека мерните станици со кои се мери загадувањето на воздухот ќе бидат поставени на вистинските позиции, а тоа според него се индустриските капацитети во Скопје.

– Една од насоките каде што може да се тргне во поглед на аерозагадувањето е да зборуваме за тоа каде моментално се поставени мерните станици на Град Скопје. Генерално во предели на домаќинства, па дури и во зелени појаси, па излегува дека виновни за загадувањето се домаќинствата, а не фабриките – смета Мециновиќ.

За обвинувањата дека во изминативе четири години, Левица била во коалиција до актуелната градоначалничка Данела Арсовска, тој возвраќа со констатацијата дека советниците на ВМРО-ДПМНЕ откако на избори победија заедно со Арсовска, ја блокираа работата на Советот на Град Скопје, за што многумина од нив беа наградени со министерски позиции во владата на Христијан Мицкоски.

– Кој го блокира градот, кој не дозволува да се набават нови автобуси, а лидерот на таа партија ги награди со следните позиции: тројца пратеници, еден министер, двајца заменици министри, директори на јавни институции и шеф на кабинетот на премиерот. Тоа е поставата која го блокираше градот три години и беше наградена, ние живееме лошо затоа што некому тоа му одговара. Тие советници на кои им беше доверен мандат од граѓаните на Скопје, го блокираа Советот кој треба да ги решава проблемите на граѓаните. И сега да заокружиме за коалицирањето. Мислам дека е вон разумот да се коментира за нешто такво, ако ние заедно со градоначалничката на 20 и нешто седмици сме повикувале да се набават автобуси. Тоа ли е коалицирање? Затоа што сакаме нови автобуси, тоа ли ќе биде коалиција и некој заговор против ВМРО ДПМНЕ – прашува Мециновиќ.

Тој очекува на претстојните локални избори, Левица да дојде до нов историски резултат и да се профилира како алтернатива на партиите коишто владеат со Македонија во изминатите 30 години.