Шпанскиот тенисер, Карлос Алкараз освои нов трофеј во кариерата, сега на АТП турнирот во Квинс, каде што во финалето го совлада Чешкиот тенисер Јиржи Лехечка со 2-1 во сетови (7-5, 6-7/5, 6-2).

Натпреварот понуди возбудувања и голема борба, особено во првите два сета, но кога беше најважно, Алкараз одигра на врвно ниво и не дозволи изненадување. Финалето траеше два часа и десет минути, а Шпанецот уште еднаш потврди зошто е број два на АТП листата.

Лехечка се бореше храбро за својата трета титула во кариерата, но овој пат не успеа да го надмине распламтениот Алкараз, кој со оваа победа ја продолжи својата импресивна низа на 17 последователни победи. Турнирот во Квинс претставува одлична увертира за претстојниот Вимблдон, каде Алкараз ќе биде еден од главните фаворити за титулата.