Ракометарите на Алкалоид обезбедија пласман во осминафиналето на ЕХФ Европскиот куп откако со две победи го елиминираше тимот на Вест Виена од Австрија.

И двата меча се одиграа во салата „Автокоманда“ во Скопје, играчите на тренерот Кирил Лазаров славеа и во реваншот овојпат со помала разлика (32:29).

Потсетување дека на првиот дуел одигран во петокот македонскиот претставник славеше убедливо со 38:27.

На возвратната пресметка најдобри стрелци во редовите на Алкалоид беа Мартин Серафимов и Александар Петковски со по седум гола.

Следниот ривал во европското клупско натпреварување Алкалоид ќе го дознае на 3 декември. Мечевите во осминафиналната фаза ќе се играат во февруари 2025 година.