Ракометарите на Алкалоид останаа перфектни и по денешното дерби против Еурофарм Пелистер откако во Автокоманда славеа победа од 32:25.

Избраниците на Кире Лазаров доминираа од почетокот до крајот на натпреварот. Патот кон победата домаќините започнаа да го трасираа од средината на првиот дел, па така на пауза заминаа со четири разлика 16:12.

Единствена дамка на победата на Алкалоид беше повредата на Никола Косетски во почетните минути од вториот дел, но и без него на теренот сино-белите доминираа.

Во последните 20 минути Алкалоид веќе имаше предност од седум разлика со 24:17, па тука веќе беше јасно дека гостите немаат шанси да се вратат во натпреварот.

Најефикасен во редовите на Алкалоид беше Мартин Серафимов со осум гола, шест постигна Бинго, а пет постигна Никола Косетски до пред да се повреди. На Еурофарм Пелистер не помогнаа ниту 12-те гола на Филип Кузмановски.