Алијанса за Албанците (AA) е сè поблиску до одлука за самостоен настап на парламентарните избори, и покрај понудата од владиниот партнер и лидер на СДСМ, Димитар Ковачевски, за заеднички настап со „Европскиот фронт“, но и од албанската опозициска тројка Изет Меџити, Билал Касами и Африм Гаши за заеднички изборен настап, брифира за „Слободен печат“ висок функционер на АА. За самостојно учество на изборите веќе има одлука на Централното претседателство на АА, а таа опција, како што повеќепати досега изјави е избор и на самиот партиски лидер Арбен Таравари. Ако соло изборната трка добие виза и од највисокиот партиски орган – Централното собрание – тогаш се очекува жестока битка, пред сè, во албанскиот политички блок.

И ДУИ и албанската опозиција, односно Европскиот сојуз за промени, парламентарните избори ги сметаа за добиени доколку Алијанса им се приклучеше во изборната трка.
Алијанса со овој став всушност е и против идејата на премиерот Ковачевски, владините партнери да настапат како Европски фронт, односно обединети да се спротивстават на ВМРО-ДПМНЕ.

Од партијата на Таравари не откриваат кои аргументи натежнуваат за партијата да е сè поблиску до одлуката за самостоен настап. Ако се знае дека партијата е поделена меѓу опциите – сами да одат на избори, со ДУИ или со ЕСП, и најмалку веројатната варијанта – во Европскиот фронт – тогаш изборот за самостоен настап може да се толкува само во насока на зачувување на единството во Алијанса. Партијата не пресекла ни дали на претседателските избори ќе излезе со свој кандидат.

Најавата на ЕСП дека ќе номинира кандидат за шеф на државата ги помати сметките и на ДУИ и на Алијанса. Можно е ДУИ во првиот круг да има свој кандидат, а во вториот да го поддржи кандидатот на СДСМ. Алијанса, пак, ако не номинира кандидат за претседател, не би било изненадување да го поддржи кандидатот на ЕСП, особено ако на Меџити, Касами и на Гаши им успее Руфи Османи да го убедат повторно политички да се ангажира.

Ковачевски уште се надева дека Европскиот фронт е остварлива идеја. Тој и вчера потврди дека имал повеќе средби со Таравари и со лидерот на ДУИ Али Ахмети, како владини партнери. Според Ковачевски, единствена алтернатива на нашата држава е зачленување во ЕУ, а дека сè друго е утопија и популизам и повтори дека се добредојдени сите кои се за европска интеграција на државата.

– Одлуките, секако, ќе бидат носени во согласност со она што го покажуваат анализите, согласно очекувањата на политичките партии и според програмите што ги имаат. За договор е потребно усогласување на многу елементи за кои сметам дека има добра основа. Ќе оставиме на времето пред нас да покаже каков ќе биде финалниот изглед и на листите и на изборите – рече Ковачевски.

ВМРО-ДПМНЕ, пак, се очекува вечерва, на седници на Централниот и на Извршниот комитет, да ја потврди одлуката за учество, но и да не гласаат за техничката влада предводена од Талат Џафери.

– Не очекувам да се зборува за кадровски решенија. Очекувам прво да се донесе одлука дека ВМРО-ДПМНЕ ќе биде дел од техничката влада. Мојот став го знаете – дека треба да бидеме дел од техничката влада и да предложиме кадровски решенија. Имаме уште две недели да ја анализираме состојбата, вклучително и името што го спомнавте – рече лидерот на ВМРО-ДПМНЕ Христијан Мицкоски, прашан дали Наќе Чулев ќе биде технички министер за внатрешни работи.