Албанскиот премиер Еди Рама најави создавање на Оператор за водоснабдување – национална структура чиј фокус ќе биде управувањето со сите извори на вода во земјата со цел да се обезбеди највисока ефикасност во секторот и квалитетна услуга за сите претплатници, објави АТА.

Рама, додаде дека Албанија има „многу драматично наследство во водниот сектор, кое бара големи инвестиции и одговорно управување“. Според него, во последните години имало и големи инвестиции и се зајакнало одговорното управување. Рама потсети дека во 2013 година имало само четири области во земјата кои имале 24-часовен циклус на водоснабдување, а загубите биле проценети на речиси 70 проценти. Според албанскиот премиер, во споредба со минатото, денес сликата во земјата е многу поинаква.

„Големите долгови, неможноста за управување во оваа област, исто така поврзани со човечките ресурси, како и недостатокот на експертиза, во комбинација со недостаток на инвестиции во одржување, доведоа до ситуација што не може да се оправда“, рече Рама.

Премиерот информираше дека ќе има и мерки против злоупотребата на водата.

„Има луѓе кои ги злоупотребуваат пералните за автомобили во населбите, имаме и други случаи со места во земјата каде што, ако внимателно погледнете, водата постојано се излева на националните патишта. Има луѓе кои ги злоупотребуваат нелегалните подземни приклучоци и планот со мерки ќе биде насочен кон нив, за луѓето кои не злоупотребуваат и кои плаќаат за својата вода да можат да добијат фер услуга“, рече Рама, пренесува БТА.