Германскиот бизнис весник „Ханделсблат“ пишува за растечкиот интерес за недвижности во Албанија, Црна Гора и Македонија. Туризмот, ниските цени и перспективата за ЕУ ​​ги охрабруваат инвестициите и развојот на пазарот, пренесува „Дојче веле“.

Во Црна Гора, поранешната тврдина Мамула,  е претворена во луксузен хотел. Ексклузивниот комплекс „Зелен брег“ е изграден на албанската ривиера во близина на Валона, додека во Драч се реализира амбициозен проект за реконструкција на главното пристаниште, вклучувајќи луксузна марина и станбен и угостителски центар, пишува „Ханделсблат“, чиј  фокус се економски прашања.

Како што се наведува големите хотелски синџири како „Хилтон“, „Мериот“ и „Интерконтинентал“ сè повеќе инвестираат во регионот, што се толкува како знак на доверба во неговиот туристички потенцијал.

Списокот на проекти и нови градби во Црна Гора, Албанија и Северна Македонија продолжува, особено во Албанија, инвеститорите се привлечени од растечка туристичка побарувачка, ниски почетни цени и ограничена понуда на атрактивни крајбрежни локации. Притоа цените на недвижностите во Албанија значително варираат во зависност од локацијата. На север, тие се движат помеѓу 1.000 и 1.500 евра за квадрат, додека во јужните туристички центри можат да достигнат 5.000 до 6.000 евра.

Во текстот понатаму се наведува дека во Скопје, главниот град на Северна Македонија, „нови станови можат да се купат по цена од 1.500 до 2.500 евра за  метар квадратен, со слична цена можат да се најдат и станови во Црна Гора, во Котор или Добра Вода,  додека куќите со базен чинат помеѓу 500.000 и 750.000 евра.

Весникот предупредува дека купувањето недвижен имот во странство не е лесно и дека треба да се избегнуваат независни купувања или онлајн портали и секогаш да се ангажира агенција која ги познава законските прописи во земјата и може да обезбеди договори и објаснувања на германски јазик. Експертите предупредуваат и на „правни ризици, можни еколошки прописи и недостаток на ликвидност, што може да биде проблем за препродажба“.