Вработен во Албанија во 2022 година работел просечно 43,7 часа неделно, од 43,3 часа претходната година, покажуваат податоците што ги објави ИНСТАТ. Други податоци на Евростат, кои го мерат работното време за европските земји и некои други земји во регионот, откриваат дека вработените Албанци имаат најдолго работно време во Европа, пренесува Ора Њуз.

Според Евростат, Европеец работел во просек 37,5 часа неделно во 2022 година, или 6,2 часа помалку (речиси еден работен ден) од Албанец. По Албанците, Србите работат подолго со 43,3 часа. За Северна Македонија, последните достапни податоци се за 2020 година, каде што просекот бил 40,9 часа.

Во 2022 година, просечната работна недела за лицата на возраст од 20-64 години во ЕУ била 37,5 часа. Евростат посочува дека евидентни се значителни разлики меѓу земјите од ЕУ. Најдолги работни недели се забележани во Грција (41,0 часа), Полска (40,4), Романија и Бугарија (и двете 40,2 часа). Спротивно на тоа, Холандија имала најкратка работна недела (33,2 часа), потоа Германија (35,3) и Данска (35,4).