Претседателот на фудбалскиот клуб ПСЖ, Насер Ал Келаифи денеска изјави дека аргентинскиот репрезентативец Лионел Меси покажал непочитување кон францускиот шампион.

Меси две сезони играше во дресот на париските „светци“, а минатата година го напушти Париз и одлучи кариерата да ја продолжи во Интер од Мајами.

Аргентинскиот фудбалер во неколку наврати изјави дека му било многу тешко во Пари Сен Жермен и истакна дека не уживал во играта.

– Зборуваме кога сме таму, а не кога нè нема. Имам голема почит кон него, но ако некој сака да зборува лошо за Пари Сен Жермен по заминувањето од клубот, тоа не е добро. Тоа не е почитување. Тој не е лош човек, но тоа не ми се допаѓа. Мојот коментар не е само за Меси, туку за сите – изјави Келаифи за „РМЦ“.

Тој објасни зошто Меси не смееше да го однесе трофејот со Аргентина на Светското првенство во Катар на стадионот „Паркот на принцовите“.

– Ние сме во Франција и Меси го победи Килијан Мбапе. Ние сме француски клуб. Не сакам ни цел стадион да биде против него. Мислам дека треба да го почитуваме тоа – рече Ал Келаифи.